URingo Madlingozi useshiya phansi kwipolitiki

Emuva kokuba iqembu lakhe i-EFF lehlelwe inombolo yamalungu azolimela ephalamende emuva kokhetho lukazwelonke obelungo mhlaka 29 Nhlaba, umculi uRingo Madlingozi usememezele ukuthi usezogxila emculweni. URingo ube ngamanye amalungu e-EFF angabuyelanga ephalamende kulohulumeni wehlandla lesikhombisa.

Lo mculi wodumo lwengoma ethi Ngiyagodola ubhale ku X [Twitter] azisa abalandeli bakhe ukuthi akasezoba mningi ezinhlelweni zepolitiki. “Angisemningi kupolitiki. Ngizohlezi ngibathanda abafowethu nodadewethu. Inhloso yami yokwelapha ngomculo isamile. Ngizofa ngiyi-fighter”, kusho yena.

Ube esehlaba ihlikiza izintatheli ebezibhala ngaye ukuthi useshiye iqembu lakhe. “Ubuntatheli benu buyinkohliso. Niqamba amanga nilokhu nithi nizwa ngemithombo ethembekile. Izifiso zenu ngeke kube ezami. Okufanele nikubhale umsebenzi wami ozophuma kuma-digital platforms ngoMandulo. Ngolokhu ngiyi-EFF mina.

Ukhuluma kanjena nje uRingo ngoMandulo ngonyaka odlule wenze isivumelwano nabe-Sony Music Entertainment ukuthi befake kuma-digital platforms ama-album akhe ayishumi nantathu (13) okugcina, ukuze abalandeli bakhe bewuthole kakula.

Kulindeleke ukuthi aqhubeke nokukhipha izingoma ezintsha emuva kokuba matasa nezepolitiki isikhathi eside.

Abanye osaziwayo ababonakale bejoyina i-EFF oTshedi Mholo, Eugene Mthethwa, Mandla Mokoena nabanye.