Kuboshwe udokotela waseKZN ngomkhonyovu we-tender
Uphiko lwamaphoyisa olwaziwa ngamaHawks lubophe udokotela waKwaZulu-Natali ophinde abe ngusomabhizinisi, uDkt. Nandi Msimang ngecala elimayelana nenkohlakalo eyenziwa kukhishwa i-tender yomtholampilo ongumahambanendlwana (mobile clinic).
Lo dokotela okumanje uvalelwe ngenxa yaleli cala uboshwe ngeSonto eSandton eGoli kanti uvele okokuqala enkantolo i-Durban Specialised Commercial Crimes Court ngoLwesibili.
Kuthiwa ngo-2016 umnyango wezempilo KwaZulu-Natali wanika inkampani kaMsimang, iMzansi Life Care i-tender ka-R32 million yemitholampilo emine engumahambanendlwana.
Okhulumela uphiko lwamaHawks KwaZulu-Natali, uSimphiwe Mhlongo uthe labomahambanendlwane babebhalise ngaphansi kwenkampani esikhundleni sokuba ngaphansi komnyango.
“Inkontileka yokusebenza kwale nkampani kwakuphume ngendlela enenkohlakalo njengoba kungalandelwangwa uhlelo oluqondile lokukhishwa komsebenzi emnyangweni”, kusho uMhlongo.
Uthe izitifiketi eziqinisekisa ukulungela kwezimoto ebezisetshenziswa ukuba semgwaqeni azizange ziyiswe emnyangweni wezempilo futhi kwazona izimoto ebezikule nkampani azisetshenziswanga kwaze kwaba iminyaka emithathu. Kuthe kusuka uMsimang wayezidayisa zonke ngokungekho emthethweni wabe esenyamalala.
NgoNhlaba wonyaka odlule amaHawaks aphume inqina emcinga uMsimang, embuza nakulunga omphakathi ukuthi awakaze yini ambone. Lokho kulandelwe ukukhishwa kwencwadi yokuthi aboshwe.
Uzogcinwa ngaphakathi aze avele enkantolo ngomhlaka-17 Ntulikazi ukuze afake isicelo sakhe se-bail.
