Izindaba

Okamaskandi Ukhala Ngokhwantalala Ngenxa Yokungakhokhelwa Umasipala WakwaNongoma

Umculi kamaskandi osazihlanganisela emculweni, uSlomo Magic ukhala ngokubanjiswa udonga umasipala wakwaNongoma emuva kokumqasha ukuthi anandise emcimbini wezimbizo zikameya wangabe usamkhokhela nokusemenze wanokhwantalala. Uthi nakuba ingekho into ebhalwe phansi kodwa unabo ukufakazi bokuthi kwaba nokuxhumana phakathi kwakhe nemeya yakwaNongoma, uKhansela C.M. Ndabandaba ukuze agcine enandisa emcimbini kamasipala.

Mayechaza uSlomo uthi wahlangana okokuqala nemeya kamasipala wakwaNongoma emcimbini weqembu i-NFP owawusenkundleni yebhola, Ulundi Regional Stadium.

“Ngizoyiqala ekuqaleni lendaba. Ngaqala ukudibana nemeya yakwaNongoma sasisOlundi Regional Stadium emcimbini we-NFP esasizonandisa kuwona. Sathi sesihamba, siphuthuma komunye umcimbi we-IFP owawuseBabanango sabona imeya ngase ngithi angibingelele kubahlonishwa. Sabingelela kahle kumeya kwamnandi, wase ethi kunemicimbi kamasipala ezayo ama-IDP roadshows, uyafisa ukuthi sibe ingxenye.

“Ngithe sengiseGoli ngase ngixhumana nemeya ukulandelela kulokhu eyayikhulume ngakho. Nebala waqinisekisa umeya ukuthi kunembizo ezoba ngomhlaka-8 Nhlaba asifike futhi wayazi ukuthi sizobe sisuka eGoli”, kusho uSlomo,

Utshele UMKHAYA ukuthi emuva kwalokho ube esehla enyuka ehlanganisa imali yokugibela kwazise wayengenalutho. “Ngibe sengingena ezikweletini ngiboleka imali ezalayo komashonisa engibaziyo, ngaze ngaphephela nakumfowethu oseMpumalanga ngaboleka nakuye”, kuchaza uSlomo.

Echaza uthe sebeyitholile imali bagibela baphikelela kwaNongoma nokuyilapho kwaqala khona izinkinga. “Sathi singena ehholo sahlangatshezwa enye insizwa esebenza kwamasipala yathi kithi kunento eyiphatha kabi, amaciko bathanda ukuwakhahlela kulo masipala. Mayechaza lo mfo uthi kwakuwona lo mcimbi esikuwo bekufanele ngabe kunamaciko anandise uhlelo lungakaqali bese amanye avale sekuqediwe ngohlelo lwezinkulumo”, kusho yena.

Uthi ngesikhathi befika ehholo babona uDkt. Buselaphi owayehamba nebhendi yakhe kanye nenye insizwa yasoLundi, uNhlaka. USlomo uthe umfo lo osebenza kwamasipala walwa ukuze bengcine benandisile.

Mayeqhubeka echaza uthi kwathi noma sekudliwa bangabizwa etendeni okwakudliwa kulona nokuyilapho okwaqala khona ungabazane ngokuhleleka kwezinto.

“Okwalandela lapho sekuqediwe satshelwa enye enye insiwa okuthiwa uSakhile ukuthi asiphuthume kwamasipala sekuyadliwa. Nakhona safika sekuphelile konke ukudla”, kusho uSlomo.

Uthe kwamasipala bafica kukhona umama uDkt. Buselaphi abaphinde bezwa ngaye ukuthi kunomama amlindile ozayo ozomkhokhela imali, nathi salinda kanye naye kodwa ngokubona kuhamba isikhathi sagcina sisukile ukuze sixoxisane nemeya ngokukhokhelwa njengoba sasibizwe iyona.

“Sesixoxa nemeya yasithembisa ukuthi izosikhokhela kweyayo imali”, kusho uSlomo othe ziningi izindleko azenzile ngohambo lokusuka nokuya eGoli futhi osekunzima kakhulu njengoba bengakhokheliwe.

Isithombe: Incwadi ebhalwe uSlomo Magic ebhekiswe kumeya wakwaNongoma, uKhansela C.M. Ndabandaba

Emuva kokulokhu bezama ukuxhumana nemeya kanye nabasebenzi bakamasipala, akukho okwenziwayo njengoba bebelokhu beyiswa le nale.

“Okwakuthiwa asikhulume nabo nanamuhla abakaze bezibambe izingcingo zami. Umbuzo ukuthi mina ngizoze ngikhulume nabathile ngoba kutheni kodwa abanye imali benikwe beqeda ukunandisa [ebhekise kuDkt. Buselaphi aveze ukuthi wakhokhelwa ngelanga lomcimbi]. Okubuhlungu mfethu ukuthi ngaboleka imali ezalayo kubantu abehlukene ukuze ngifike kulo mcimbi. Sekunzima nokuyibuyisela lemali njengoba mangihola ngisala ngingenalutho. Lento isize yangidalela ukhwantalala ngoba ifaka nabanye abantu engangihamba nabo engingazi ukuthi ngizobakhokhela ngani”, kubalisa uSlomo.

Isithombe: Esiveza imali esala kwi-account kaSlomo Magic emuva kokuba esekhokhele izikweletu azenza eqashwe umasipala wakwaNongoma

Uthi ngisho ehola usehlalelwe ukukhipha imali akhokhele omashonisa. “Ngisho abafowethu laba abangisinelayo abasebenzi babheke lokhu engisuke ngizobanika manje kunzima, inzima impilo esiyiphiliswa abaholi bethu”, kusho uSlomo.

Ukuze kuzwakale zonke izinhlangothi ezithintekayo odabeni, UMKHAYA ubhalele imeya yakwaNongoma umyalezo nge-email nange-whatsapp kodwa kuze kwabhalwa udaba ingakaze iphendule.

Ikhasi lika-Facebook likamasipala wakwaNongoma liphawulile liphendula inkulumo kaSlomo lathi: “Ngokwazi kwethu njengomkhandlu bekungakakhokhelwa muntu kodwa bonke [abantu] bazokhokhelwa kuyo lenyanga. Baningi abalindile sibala oDumakahle, Dkt. Buselaphi, Thokozan Langa, Menzi nabanye abaningi. Uma kukhona imibuzo onayo bekumele usondele ehhovisi emkhandlwini uzolandelela ngendlela eqondile. Kodwa-ke sisizwile isikhalazo sakho, sizolandelela ngendlela eqondile bese sibuya kuwe maduze”.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.