Izindaba

Ugwetshwe-18 Weminyaka UDkt. Owabulala Amadodakazi Akhe Amathathu

Udokotela wakuleli u-Lauren Dickason ugwetshwe inkantolo ephakeme yase-New Zealand iminyaka eyishumi nesishiyagalombili (18) ngecala lokubulala amadodakazi akhe amathathu. Lo dokotela uzodonsa isigwebo sakhe ekhaya labanokukhubazeka ngokomqondo elingaphakathi esibhedlela i-Hillmorton Hospital esise-New Zealand.

Kuthiwa selokhu aboshwa uhlala kuso lesi sibhedlela njengoba elashelwa isifo esiphathelene nezengqondo.

Nakuba inkantolo imgwebe iminyaka eyi-18 u-Lauren ehlala ekhaya labakhubazeke ngomqondo, izazi zomthetho kuleliyazwe zithi inkantolo isengashintsha umqondo imfake ejele. Kuthiwa angakwazi ukuthola ushwele emuva kweminyaka eyisithupha.

Umshushisi kuleli cala u-Andrew McRae utshele inkantolo ukuthi lo dokotela kumele athole isigwebo sikadilikajele neminyaka eyi-18 ebhadla ejele ngaphambi kokuthola ushwele. Ubize isenzo sika-Laurens njengesinesihluku esesabekayo nesingakaze senzeke e-New Zealand.

Iphephandaba lakuleliya zwe i-New Zealand Herald ibike ukuthi iJaji Cameron Mander linqume ukuthi isigwebo sikadilikajele neminyaka eyi-18 asinabo ubulungiswa labe selikhipha isigwebo seminyaka eyi-18 ehlukene kathathu kodwa ezodonswa kanye kanye.

Intatheli yaleli phephandaba ibike ukuthi iJaji Mander likhipha isigwebo lithe likholwa ukuthi isenzo sika-Lauren siwumphumela wengcindezi ayengaphansi kwayo ngoba uwakala uwumuntu onothando.

Kuthiwa ngomhlaka-16 Mandulo 2016 ngesikhathi umyeni wakhe esayodla isidlo sakusihlwa nozakwabo, u-Lauren wabulala ngokusonta intamo amadodakazi akhe amathathu o-Liane oneminyaka eyisithupha (6), namawele aneminyaka emibili (2), oMaya no Karl. Waqale wawaphika lamacala kodwa ngokuhamba kwesikhathi inkantolo yamthola engekho msulwa kulamacala ayebekwe wona.

Iqula leli cala inkantolo yathola ngabameli bombuso ukuthi u-Laurens wayenengcindezi enkulu eyamenza waba nokhwantalala nokwaba imbangela yokuthi aziphathe ngendlela enesihluku ngobusuku abulala ngabo abantwana bakhe.

Enkantolo kuvele nokuthi ukuhlushwa izingane kwanyusa kakhulu ingcindezi eyayivele inqwabelene kuye eyamenza wadideka ekhanda. Nokho umshushisi kuleli cala u-McRae ukuphikile ukuthi u-Lauren wayebuswa ingcindezi, uthe wayazi kahle ukuthi lento ayenzayo ayilungile.

Ochwepheshe bezengqondo ababizwe kuleli cala ukuthi bezofakaza ngemuva kokuhlola isimo sengqondo sik-Lauren, abathathu okungo-Dkt Erik Monastero, Dkt. Simone McLeavey, noDkt. Justin Barry-Walsh bavumelane ngokuthi nakuba u-Lauren wayenokhwantalala olwalumfakela ingcindezi kodwa wayenolwazi ukuthi isenzo sakhe asilaungile.

Kwase kuthi ababili oDkt. Susan Hatters-Friedsman, noDkt. Ghazi Metoui bakholwa ukuthi u-Lauren unawo amaphuzu okuzivikela kuleli cala.

Ngesikhathi kukhishwa isigwebo saleli cala ngoLwesithathu umyeni ka-Lauren, u-Graham Dickason uthe uyamxolela unkosikazi ngesenzo sakhe. Ubaba ka-Lauren u-Malcom Fawke ucele ijaji ukuthi limthambisele isigwebo u-Lauren, “..ngoba vele usekutholile ukujeza kwamanje ngosizi aphila ngaphansi kwalo njengoba engasenalutho”.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.