EZIKAMABONAKUDEIzindaba

Kuhlukene Imibono Kubabukeli Ngokubuyela Kuka ‘Tau” Ku-Generations The Legacy

Kuhlukene imibono kubathandi bomdlalo i-Genereations The Legacy emuva kokuzwakala kwezindaba zokuthi umlingisi osemnkantshubomvu uRapulana Seiphemo odlala indawo kaTau kulomdlalo ushaya ibuya. USeiphemo sekuwuyena mlingisi walo mdlalo osenesikhathi eside ebonakala kuwona. Ubonakale kuwona kusukela ngesikhathi uqala, kusadlala izinkakha oSophie Ndaba owayedlala indawo ka-Queen no Connie Ferguson owayedlala indawo kaKarabo.

Eminyakeni edlule lo mdlalo usabizwa nge-Generations, abalingisi bawo bake babhikishela umsunguli wawo uMfundi Vundla, bekhala ngemali encane abebeyihola nokunye abebenganelisekile ngakho. UVundla ngaleso sikhathi uvele wawuqala phansi wawubiza nge-Generations The Legacy, kodwa ngaphambi kwalokho uqale waxosha inqwaba yabalingisi okuhlanganisa noZolisa Xaluva, owayedlala indawo ka-Jason, u-Anga Makubalo owayedlala indawo ka-MJ, uMenzi Ngubane owayedlala indawo kaSbusiso, uNambitha Mpulwana owayedlala indawo kaMawande nabanye abaningi.

Ngesikhathi bexoshwa laba uSeiphemo ubengeyona ingxenye yalo mdlalo nokuthe esewuqala phansi umdlalo uVundla wase emlanda.

Lezi ndaba zokubuyela kukaSeiphemo kwi-Generations zizwakale ngomlandeli wakhe obebhale ekhasini lika-X, u-@PhilMphela. “U-Rapulana Seiphemo ubuyela kwi-Generations. Lo mlingisi uyabuyela kwi-Generations The Legacy ukuzovusa indawo yakhe kaTau Mogale. USeiphumo uzovela kulo mdlalo oku-SABC 1 ngomhlaka-3 Ntulikazi”, kusho lo mlandeli.

Abanye abaphawulile bekhomba ukuthakasela ukubuya kwalo mlingisi o-@BomepomeNovel othe: “Ngathanda lapho”, no-@KgothatsoMokwe6 othe: “UKarabo no Tau abadlali basebenza unomphelo kwi-Generations The Legacy”, u-@mlambya_kunyela uthe: “Njengemanje sekumele kubuyiswe indawo ka-Archie Moroka ngoba lena kaTau ayisenamthelela otheni njengakuqala”.

INTATHELI YOMKHAYA

UMKHAYA iziko lezindaba elibika ngolimi lwesiZulu izihloko ezisematheni, ezosaziwayo, ezemfundo, ezemidlalo kanye nangabantu abenza izinto ezinhle emphakathini. Sibika zonke izindaba ngokuthembeka, ngeqiniso nangobuqotho.