Isikole Sendodana Sifaka Imoto Ka Sello Maake Ka Ncube Endalini

Usesebenzise imali eningi ezama ukuvikela ukuthi imoto yakhe i-Audi A4 ingadayiswa isikole sendodana yakhe uSello Maake Ka Ncube. Lokhu kuza emuva kokuthi lesikole simthumelele amasamanisi okuthi uyasikweleta njengoba indodana yakhe ifunda kusona nakuba engakaze ayibhalise kuso.

Kuthiwa oke waba sebudlelwaneni bezothando naye [uSello], uMmatshilo Motsei wabhalisa indodana yabo esikoleni njengombheki osemthethweni womntwana, kwase kuthi udadewabo wasayina njengengofakazi okuyobanjiswa ngaye uma ehluleka ukukhokha umbheki osemthethweni.

Isikole sisabisa ngokudayisa imoto kaSello nje asikaze simnike ithuba lokuphikisana nesifiso saso sokudayisa imoto yakhe endalini. Into eyenzeka ukuthi kwafika kuSello isikhonzi senkantolo yase-Lenasia simazisa ngesikweletu sendodana yakhe esikoleni, ngenxa yokucabangela ikusasa lendodana yakhe wasivuma isikweletu kanti usezifaka otakwini.

NgoLwesithathu uSello ufake amaphepha enkantolo i-Johannesburg High Court ephikisana nesikhonzi senkantolo yase-Lenasia nesifiso sesikole sokudayisa imoto yakhe.

Kulamaphepha asenkantolo kuvela isikhonzi senkantolo yase-Lenasia njengommangalelwa wokuqala, isikole sendodana njengommangalelwa wesibili nobeyisithandwa sakhe uMotsei, uSello akhala ngokuthi uyena omfake kulo lonke lolutalatiya.

Kuvela ukuthi isikole okufunda kuso indodana safaka amaphepha enkantolo yase-Lenasia sifuna kuphoqwe uMotsei noSello ukuthi bekhokhe isikweletu ngoLwezi wonyaka odlule ngemuva kokuhluleka ukukhokha imali yezindleko zokufunda kwendodana yabo. “Ngezwa ngesenzo sesikole sokuya enkantolo ngoNhlalanja kulonyaka ngesikhathi kufika isikhonzi senkantolo sithi sizothatha impahla yami ukuze kukhokheke isikweletu sesikole”, kusho uSello.

Uma echaza uthi wafaka ngokushesha amaphepha enkantolo ephikisana nalokho, kwase kuthi ukuma kancane ukuthathwa kwempahla yakhe.

Nakubo wazama ukuvimbela lokhu kodwa isikhonzi senkantolo safika kwakhe ngomhlaka-22 Nhlolanja 2024 sathatha imoto yakhe i-Audio A4. Uthi ngenxa yokugwema ukuphoxeka wazama ukuthi imoto yakhe ibuye wahlanganisa imali engu-R20 000 wayikhokha esikoleni. Babe sebemika yonke imininingwane ephathele nesikweletu nokuyilapho athola khona ukuthi imali eyisikweletu sesikole ingaphezulu kuka-R250 000.

Emuva kwalokho ube esefuna iziluleko zomthetho nokuyilapho athole khona ukuthi angakwazi ukusiphosela inselelo isikole ngalolu daba njengoba yena engakaze enze isivumelwano esibhalwe phansi naso sokusikhokhela imali yokufunda kwendodana yakhe.

“Ngesikhathi ngikhuluma okokuqala nesikhonzi senkantolo ngakuveza ukuthi inhloso yami ukulekelela ummangalelwa wesibili ukuthi akwazi ukukhokhela isikole imali yaso ngoba kuthinta indodana yami,kodwa anginayo inhloso yokugxambukela kwisivumelwa anaso sokukhokhelana izimali nesikole. Kucacile nje, akukho mina okungihlanganisa nommangalelwa wokuqala”, kusho uSello.

USello uthe okuxakayo ukuthi akaze awathole amaphepha amazisa kahle ngesikweletu sesikole. “Angikaze ngaziswe kahle ngalesikweletu noma kufike umuntu kimi akhulume lolu daba kodwa kim kwafika isikhonzi senkantolo sezizosho ukuthi sizothatha izimpahlz zami ngoba ngihluleka ukukhokhela isikole ngakuvimba lokho. Okwalandela ukufika kwakhe ngingekho ekhaya wacekela phansi impahla yami, kuhlanganisa ukulimaza isango lakwami okwakubeka umndeni wami engcupheni yokungaphephi.

“Sathatha imoto yami noma sesimazisile ukuthi luyaxoxwa lolu daba nommangalelwa wokuqala”, kusho uSello.

Uthe emaphepheni asenkantolo akukho lapho kuvela khona ukuthi isivumelwano sakhe nesikole sibhalwe phansi noma esomlomo.

“Okokuqala, ekhasini lesithupha (6) lesicelo sokufunda esikoleni elibhalwe usuku lwangomhlaka-14 Mfumfu 2014 kuvela ukuthi ummangalelwa wesibili wasayina, endaweni kababa womfundi akusayine muntu. Lokho kuwubufakazi bokuthi asikho isivumelwano engisenze nesikole mgomhlaka-14 Mfumfu 2014. Okwesibili, khona ekhasini lesithupha, uLenyalo Motesi onguninalume wendodana yami wasayina njengofakazi oyokhokha uma umbheki osemthethweni womfundi ehluleka ukukhokha. Mina akukho okungihlanganisa nalesivumelwano.

“Ngakho, ngokomthetho akukho mina okungihlanganisa nalesivumelwano nokukhokhela isikweletu ngoba akukho engakusayina”, kusho uSello emaphepheni asenkantolo.

USello uthe yonke lento eyenzekayo ayifaki nje yena kuphela enkingeni kodwa ifaka nomkakhe u-Pearl Mbewe ashade naye umshado ohlanganisa amafa.

“NJengoba kuthathwe imoto nje, naye unengxenye kuyo, ngakho okunye okuthiwa kuzothathwa unengxenye naye kukho njengomikazi wakho konke okungokwami”, kusho yena.

Lo mlingisi oke wabonakala emdlalweni kamabonakude i-Skeem Saam uthe ugcine ekhipha imali engu-R30 000 esikoleni ukuze avikele ukungafakwa endalini kwemoto yakhe ebiza ngaphezu kuka-R120 000 ngoba isikhathi siyahamba.

“Abukho ubulungiswa kulento ngoba ngamtshela [uMotsei] ukuthi angeke ngikhone ukukhokha imali yalesikole kodwa yena waqhubeka nokubhalisa ingane wangangifaka mina’, kuphetha uSello.