Uyoculela Umhlaba Emuva Kokunqoba Indondo Ye-MMA24 UBongeziwe Mabandla
Umshayi wesiginci esinenkosi phakathi ophinde abe umculi we-pop uBongeziwe Mabandla usememezele ukuthi uzoba nohambo lokuyonandisa emazweni ahlukene emhlabeni. Uveze lezindaba emuva kokunqoba indondo ye-Best African Pop emcimbini i-Metro FM Music Awards 2024 obuseMbombela Stadium eMpumalanga ngoMgqibelo.
Kulo munxa uBongeziwe ubebanga nezinye izingwazi zomculo oZonke, Izinkabi Zezwe, Lwah Ndlunkulu noNomfundo Moh.
Lo mculi ongowokudabuka kuTsolo e-Eastern Cape uqale ukwaziwa emculweni ngo-2012, ngengoma ethi Umlilo lapho asebenze khona nomqambi wezingoma, umdidiyeli u-Tiago Correia-Paulo osemsize ukuqopha ama-album afana ne Mangalise (2017), Lemini (2020) neyakamuva ethi Amaxesha (2023).
Ingoma kaBongeziwe ethi Umlilo ithandwe kakhulu emazweni angaphandle njengoba ibihamba phambili kuma-charts omsakazo wase-France i-Radio France Internationale (RFI).
Ekhuluma nezintatheli emuva kokunqoba indondo ngoMgqibelo uthe ubeqala empilweni yakhe ukukeliswa nabantu okufanele banqobe izindondo emcimbini omkhulu kangaka. “Okungisiza kakhulu ukufaka umfutho kwengikwenzayo nokungagxumagxumi kodwa ngihlale endaweni eyodwa bese ngiqinisa kakhulu lapho engenza kahle khona.
“Angikholwa ukuthi kunencwadi ebhaliwe yokusiza umuntu ukuthi ahlale kulokhu okumsebenzelayo kodwa ngiyazama njalo ukulandela umgudu owodwa wokwenza izinto ngesikhathi ngiqhubeka ngenza engikwenzayo”, kusho uBongeziwe.
Ubonge kakhulu abantu abalandela umsebenzi wakhe nabawuthandayo. “Ngiyabonga kakhulu kubantu abangesekayo, bahlale bemi nami njalo bengeseka noma nini. Uthando lwenu luyangigqugquzela ukuthi ngenze okungcono zonke izinsuku. Ngizizwa ngibusisekile ukuhamba nani loluhambo”, kubonga yena.
Amazwe azowahambela emhlabeni nezinsuku:
21/05/24 Hakken, Hamburg, Germany
22/05/24 Yuca, Cologne, Germany
23/05/24 Kantine Am Berghain, Belin, Germany
28/05/24 Ante Festival, Winterthur, Swirtzerland
01/06/24 Bushfire Festival, Malkerns, Eswatini
07/07/24 Metropolis Festival, Rotterdam, Netherlands
18/07/24 Valkhof Festival, Nijmegen, Netherlands
21/07/24 Cabane, Bambou, Saint-Tropez, France
01/08/24 Midzomer Festival, Leuven, Belgium
03/08/24 Wilderness Festival, Oxforshire, UK
06/08/24 Muhle Hunziken, Rubigen, Swirtzerland
