Uboshiwe Unogada Wemali ‘Oziphe’ R26 000 Emalini Obekumele Iye Kwikhasimende
Uvele enkantolo ngoLwesibili unogada wemali obenikwe imali engu-R209 500 usomabhizinisi wasoLundi ukuba ayihambise kwikhasimende elinenkampani esebenzela e-Richards Bay kodwa yena [unogada] wacaphuna ingxenye yalemali engu-R26 000 wayifaka ephaketheni lakhe. Lesi gameko senzeke mhlaka-11 Ndasa kanti ikhasimende lizobona ngoMsombuluko, mhlaka-15 Ndasa ukuthi imali elithunyelwe yona ayiphelele.
Lazise usomabhizinisi obethumele imali, kwabikelwa namaphoyisa abe eseqala uphenyo ngawo uMsombuluko. Ophenyweni lwamaphoyisa kutholakale ukuthi lonogada wenze ubushompeshompe ebhukwini okubhalwa kulo imali kwabe sekuvulwa icala lokweba esiteshini samaphoyisa e-Richards Bay.
Uphiko lwamaphoyisa i-Directorate for Priority Crimes Investigations olwaziwa ngama-Hawks lunikele emzini wakhe lonogada kwatholakala imali engu-R26 000 ongu-cash. Ube eseboshwa ngaso leso sikhathi.
Inhloko yama-Hawks KwaZulu-Natal uMajor General Lesetja Senona uncome amaphoyisa ngomsebenzi omuhle.
Kwesinye isigameko esifuze lesi, uLehlohonolo Rankuoatsana (39) ongunogada wemali kwinkampani i-SBV uboshiwe naye ngokweba imali engu-R500 000 obekumele ifakwe kwi-ATM kwelinye lamadolobha esifundazweni i-Free State. Kubikwa ukuthi uRankuoatsana uyebile lemali wase enyamalala. Kube sekubikelwa amaphoyisa abe esembheka. Utholakele wabe esededelwa ngesexwayiso emuva kokuvela enkantolo kamantshi e-Bloemfontein.