U-Robinho Owagqama Ku-Brazil Uphezu Kwamasu Okubalekela Ijele
Abameli baka-Robinho oke wagijima ku-Manchester City naku-Real Madrid kuthe ngoLwesine bafaka isicelo sokubambezela ukuqala isigwebo sakhe seminyaka eyisishiyagalolunye (9) ku-Supreme Court yase-Brazil ukuze bebe nesikhathi esanele sokulungisa amaphepha okwedlulisa icala. Lo mdlali oneminyaka engamashumi amane (40) wagwetsha inkantolo yase-Italy ngo-2013 ngecala lokunukubeza owesifazane ehlangene nabangani bakhe endaweni yokuzijuxuza edolobheni laseMilan ngesikhathi esadlala ku-AC Milan.
U-Robinho ugwetshwe okokuqala inkantolo yase-Italy ngo-2017, waledlulisa icala. Emuva kwalokho ubuyele ezweni lakhe i-Brazil kanti inkantolo yokwedlulisa amacala yase-Italy izovuna isinqumo senkantolo yokuqala sokuthi agqunywe ejele iminyaka eyisi-9.
Imithetho yase-Brazil ayikuvumeli ukuba izakhamizi zakhona ziyiswe emazweni ezenze kuwona amacala ngenhloso yokuthamela izinkantolo nokuqala izigwebo okuphoqe ukuba umnyango wezobulungiswa ngokumelwa ihhovisi labashushisi e-Italy ufake isicelo kuziphathimandla zamaphoyisa e-Brazil ukuthi u-Robinho asiqale khona ezweni lakhe isigwebo sakhe.
Kuthe ngoLwesithathu emuva kokucubungula isicelo se-Italy amajaji ase-Brazil ayisi-9 ehlula amabili (2) avumelana naso isicelo e-Italy, lamlahla kanjalo u-Robinho.
Nakhu-ke ngoLwesine abameli bakhe sebefaka isicelo e-Supreme Court ngenhloso yokubambezela ukuba aqale isigwebo lomdlali oke wadlala no-Zinedine Zidane no David Beckham ku-Real Madrid ngaphambi kokulibangisa ku-Manchester City.
Akuqali ukuthi u-Robinho abe secaleni lokunukubeza abesifazane njengoba kuthe ngo-2009 waboshwa emuva kokuba intombazanyana esencane yamvulela lokunubukezwa uye esiteshini samaphoyisa e-England. Nokho waphunyuka emuva kokuba uphenyo lwamaphoyisa lungatholanga ubufakazi obuqanda ikhanda ngalesigameko.
