Uzalo Lumbuyisela Emsakazweni U ‘Mr Magic’
Uzobonakala emdlalweni ongaconsi phansi kubabukeli Uzalo, uLinda ‘Mr Magic’ Sibiya oke waba umsakazi woKhozi FM. Kulonyaka Uzalo lugubha iminyaka eyishumi ludlala ku-SABC 1 phakathi nesonto ngokugamanxa kwehora lesishiyagalombili (20:30) ebusuku.
Lomdlalo selokhu uqale ukudlala kumabonakude ngo-2014 ulokhu uyintandokazi kubabukeli bawo yonke iminyaka. Njengoba selungena kwi-season yeshumi abakhiqizi bawo bathembisa iziqephu ezizokhuluma ngempilo yangempela ephilwa abantu emiphakathini. Izinto okuzogxilwa kuzona ezithinta ubuntu, inkolo, impilo kamoya nesiko.
USibiya uzofika kulomdlalo njengomsakazi we K-Mash FM ebhekene nezinkinga, kanti yena ufika njengomsindisi wesiteshi, uzosivuselela ngezinhlelo ezihlabahlosile sibuyelwe udumo lwaso oludala. Ufika njengomsakazi onekhono elimangalisayo ozokwenza uhlelo lwasekuseni lugcine abalaleli behleli kulesi teshi ngezihloko ezishisayo azokhuluma ngazo.
“I-season yeshumi izothi iqala nje ibe ishuba, kukhona abazobe beziphindiselela kwabanye emphakathini wakwaMashu. Kunezimfihlo ebezifihliwe ezizovela kanti abanye bazoba nemikhankaso ecekela abanye phansi.
“Kuyangithokozisa ukugubha iminyaka eyishumi noZalo. Lokhu kuwubufakazi bokuthi isiteshi sethu sizinikele ngempela ukudlulisa indaba ngobunyoninco nangobunono eNingizimu Afrika”, kusho u-Ofense Thimane oyi Channel Head e-SABC.
USibiya uza kulo mdlalo nezinye izingwazi njengoba noMnqobi Kunene naye ezoba ingxenye yawo. UKunene yena uzodlala indawo yokuba uGeja oyinduna yamabutho eyisethenjwa seNkosi ebukhosini baseNdlendle.
“Kuyo yonke leminyaka eyishumi, Uzalo beluhleze njalo lukhuphula izibalo zababukeli balo futhi lwenza izinto ngendlela ehlukile kuneminye imidlalo ejwayelekile kumabonakude waseMzansi”, kusho uKing David Mukwevho oyi Series Producer kuZalo.
“Asigcinanga ngokujabulisa ababukeli kuphela kuzo zonke izindawo kodwa siphinde saba isango lokuvela kwabalingisi abaningi abebengakaze babonakale ndawo kumabonakude kanye nabasebenza ekukhiqizweni kwawo lomdlalo. Njengoba samukela abalingisi abasha ethimbeni lethu sifisa ukuphinde simeme ababukeli bethu abathembekile ukuthi bebe kanye nathi kwevuthayo i-season yeshumi”, kwengeza uMukwevho.
