Isiboshwa Nezikhulu Zejele Ebhizinisini Lomahosha, Izinkabi Nezidakamizwa
KUNGAKASABALALI imibiko yokweqa kwakhe ngo-2022, uThabo Bester obeyisiboshwa ejele laseMangaung Correctional Facility ubeqhubha ibhizinisi ebelenza enhle imali lomahosha nezidakamizwa. Lokhu bekwenziwa kube lula abasebezi abangonogada nabasebenzi abayizikhulu zejele.
Kunombiko omboziwe eMnyangweni wezamaJele odalula ulwazi olubucayi ngezinsolo eziqinile zokuthi onogada besifazane bebesetshenziswa izikhulu zejele neziboshwa ezingomaqhuzu [kuhlanganisa uBester] njengomahosha bephinde bedayise izidakamizwa.
Kulo mbiko kuvela nokuthi belwakhiwa kanjani uhlelo lokudlisa ubuthi laba abasuke bebone yonke lemikhuba ebigilwa ngenhloso yokubayisa kwagoqanyawo.
Okunye okuvela kulo mbiko indlela esinye sezikhulu esasiyisebenzisa ukufaka izidakamizwa ngaphakathi emagunjini eziboshwa ezazingamakhasimende, indlela okwakukhokhelwa ngayo izinkabi zangaphakathi ejele ezazisoconga laba ababezimpimpi uma kungeke kwenzeke ngobuthi, nokufaka imali ngaphakathi ejele.
Izinkukhu zase ziwusola umgqakazo ngo ‘mshovo’ owawuqhubeka kulela jele njengoba uBester wenza isu lokweqa ngokuthi enze ngathi kushe igumbi lakhe wafa ngenxa yesisi nomlilo. Lokhu kweqa kwaba impumelelo esizwa intombi yakhe eyayiwu dokotela, uNandipha Magudumana noyise wayo.
Ekuphumeni kwakhe ejele ube esephila impilo ephezulu ehambela nezindawo zomtakabani kanti emzini abehlala kuwo nentombi yakhe eHyde Park eGoli belungadliwa olubabayo.
Ube esekhululeka kakhulu kanti bakhona abazombona wagcina eboshwe eTanzania nayo intombi yakhe bezama ukubaleka. Laba bobabili (2) kanye nabanye abayisikhombisa (7) ababoshwe nabo babhekene namacala anzima kuhlanganisa awokubulala, ukukhwabanisa nokuphula umthetho wokuthwala kwezidumbu. Bazovela enkantolo enkulu yase Bloemfontein ngoLwesithathu.
