I-International Court Of Justice (ICJ) Izohlalela Icala Elifakwe Elakuleli Libopha Elakwa-ISrael
IZWE lakwa-Israel selinqume ukuthi lizovela phambi kwenkantolo yezobulungiwa yomhlaba i-International Court of Justice (ICJ) eHague ukuze iziphendulele ecaleni elifakwe iNingizimu Afrika lokuqotha imbokode nesisekelo eGaza.
Abezindaba bakwa-Israel babike ukuthi u-Prime Minister uBenjamin Netanyahu uthathe lesinqumo ukuvimbela i-ICJ ukuthi ingakhiphi isahlulelo sokumisa umbutho wabo nezinhlelo zabo zonke zokuqhubeka nempi eseGaza.
Okhulumela uHulumeni wakwa-Israel u-Eylon Levy ugxeke iNingizimu Afrika ngokuseka iHamas kulempi. “Sifuna ukukusho kucace ukuthi siyayigxeka iNingizimu Afrika ngokukhetha uhlangothi lukaSathane futhi izifake shi ecaleni labantu abayimbangela yesibhicongo esaba ngomhlaka 7 Okhthoba. Ngomhlaka 7 Okhthoba iNingizimu Afrika kufana nokuthi yayikhona ngesikhathi iHamas ibulala futhi idlwengula abantu emakhempini. Vele akuqali manje ukuthi iNingizimu Afrika ikhethe uhlangothi lwababulali njengoba yake yaseka u-Omar Al Bushar emuva kokuba ehlulelwa ngamacala okubulala inqwaba yabantu eDarfur”, kusho uLevy.
Elakwa-Israel lisola iNingizimu Afrika ngokuvikela iHamas emuva kokuba yenza isihluku kubantu bakhona ngomhlaka 7 Okhthoba. Kuzothi ngomhlaka 11-12 Januwari 2024 i-ICJ ilalele izethulo zeNingizimu Afrika ngecala elifakele i-Israel.
Umqondisi-Jikelele eMnyangweni WezokuXhumana namaZwe nokuSebenzisana uMnuz. Zane Dangor uthe iNingizimu Afrika ikulungele ukuyokwenza izethulo ku i-ICJ. “Into yethu icacile, thina siyokwethulela i-ICJ icala elenziwe lokubulawa kwabantu ngaphansi komthetho oqondene nalamacala ngenhloso yokuthi inkantolo ivikele abantu futhi ijezise abenzi bokubi”, kuphela uDangor.