Unqobe Kukubi ‘Umjolo Lowo’ Ka Khuzani

IDLALWE sekuvalwe amehlo OKhozini FM phakathi kwamabili ingoma kaKhuzani (osesithombeni) ethi ‘Umjolo Lowo’ njengoba beyishudulisana nekaMthandeni SK ethi ‘Paris’ emncintiswaneni wengoma ehlukanisa unyaka. EkaKhuzani kube iyona emuke nalomklomelo kulomsakazo ngamavoti abecela esigidini. Nokho ngaphambi kokuba inqobe lengoma kuke kwaba nezinsolo ebezibhekiswe kumphathi woKhozi FM uSbongi Ngcobo obekuthiwa ushomene nezikhulu zebhange lase Standard Bank uKhuzani ayinxusa lalo, ukuthi kwenziwe ubushompeshompe ukuze anqobe. Nokho i-SABC iye yakhipha isitatimende iqinisekisa ukuthi lolu hlelo lokuvota luthembekile njengoba kunanenkampani ezimele yangaphandle enikezwe umsebenzi wokungamela nokubala amavoti.